أنا اللي بالأمر المحال اغتــوي
شفت القمر نطيت لفوق في الهـــــوا
طلته ما طلتوش إيه انا يهمنـي
و ليه .. ما دام بالنشوة قلبي ارتوي
و ليه .. ما دام بالنشوة قلبي ارتوي
-------------------------------
أنا قلت كلمة و كان لها معنييـــن
كما بطن واحده و توأمين زي وشين
لو دنيا شر.. التوأم الخير يمــوت
لو دنيا خير .. الشر ح يعيش مــنين
----------------------------------
منين أجيبها كلمه متألمــة
لعيبه فايره حايره و مصممـــه
منين اجيبها كلمه تكون بنـــت ارض
تشفي اللي ما شافهوش كلام السمـا
--------------------------------------
كام اشتغلت يا نيل في نحت الصخور
مليون بئونه و الف مليون ها تور
يا نيل أنا ابن حلال و من خلفتــك
و ليه صعيبه علي بس الأمــور
------------------------------------------
خوض معركتها زي جدك ما خاض
صالب و قالب شفتك بامتـعاض
هي كده...ما تنولش منها الأمـل
غير بعض صد ورد ووجاع مخاض
-----------------------------------------
ولدي إليك بدل البالون ميت بالـون
انفخ وطرقع فيه علي كل لــون
عساك تشوف بعينك مصيرالرجـال
المنفوخين في السترة و البنطلــون
-----------------------------------------
ولدي نصحتك لما صوتي اتنبــح
ما تخفش من جني و لا من شبــح
و ان هب فيك عفريت قتيل إسألــه
ما دافعش ليه عن نفسه يوم ما اندبح
---------------------------------------------
يأسك و صبرك بين إيديك و انت حر
تيأس ما تيأس الحياه راح تـمر
أنا دقت مندا ومندا عجبي لقيــت
الصبر مر و برضك اليـأس مـــر
-----------------------------------------
حاسب من الاحزان و حاسـب لها
حاسب علي رقابيك من حبلـها
راح تنتهي و لابد راح تنتهــي
مش انتهت أحزان من قبلهــا؟
-----------------------------------------------
فتحت شباكي لشمس الصبـاح
ما دخلش منه غيــــر عويل الريـاح
وفتحت قلبي عشان ابوح بالألــم
ما دخلش منه غيــــر عويل الريـاح
وفتحت قلبي عشان ابوح بالألــم
ما خرجش منه غير محبه و سمــاح
----------------------------------------------
مرحب ربيع مرحب ربيع مرحبـــه
يا طفل يا للي ف دمي ناغا وحبـا
علشان عيونك يا صغنن هويـــت
حتي ديدان الأرض و الأغربـــة
--------------------------------------------
انا الذي عمري اشتياق في اشتيـاق
و قطر داخل في محطة الـفراق
قصدت نبع السم وشربت ســم
من كتر شوقي وعشمي في الترياق
----------------------------------------------
لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شــئ
انا كنت اجيب للدنيا ميت ألف ابـن
----------------------------------------------
العشب طاطا للنسايم و نــخ
أخضر طري مالهش في الحســن أخ
عصفور عبيط انا .. غاوي بهجه و غنا
ح انزل هنا.. و انشا لله يهبرني فـــــخ
---------------------------------------------
أوصيك يابني بالقمر و الزهـــور
أوصيك يابني بالقمر و الزهـــور
أوصيك بليل القاهرة المسحـــور
و إن جيت في بالك .. إشتري عقد فل
لأي سمرا.. وقبري إوعك تــزور
------------------------------------------
غمست سنك في السواد يا قلـــم
عشان ما تكتب شعر يقطر ألــم
مالك جرالك إيه يا مجنون ...
و ليــــــــه رسمت ورده وبيت و قلب و علـــم
-------------------------------------------------
غمض عينيك و ارقص بخفة و دلع
الدنيا هي الشابة و انت الـجدع
تشوف رشاقة خطوتك تعبـدك
لكن انت لو بصيت لرجليك ....تـقع
-------------------------------------------------------
إيديا في جيوبي وقلبي طـــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــترب ؟
-----------------------------------------------
زحام و أبواق سيارات مزعجــة
للي يطول له رصيف.. يبقي نجـا
لو كنت جنبي يا حبيبي أنــا
مش كنت أشوف إن الحياة مبهجة
-----------------------------------------------
ياللي عرفت الحب يوم و انطـــوي
حسك تقال مشتاق لنبع الهــوي
حسك تقول مشتاق لنبع الغـــرام
ده الحب .. مين داق منه قطره...ارتوي
-----------------------------------------------
يا ميت ندامه ع القلوب الخـلا
لا محبة فيها و لا كراهـــه ولا
حتي يا قلبي الحزن ما عادش فيـــك
معلهش .. لك يوم برضه راح تتملا
